Á staðnum er rekin
hestamiðstöð. Hestaleigan er opin allt árið og styttri hestaferðir með leiðsögn farnar daglega á sumrin. Margar góðar reiðleiðir eru í nágrenninu fyrir jafnt byrjendur sem lengra komna. Einnig eru í boði hestasýningar fyrir hópa, bæði innan - og utandyra. Vetrardvöl með reiðkennslu og vinsæl reiðnámskeið fyrir börn og unglinga eru í boði á sumrin.
Mikill metnaður er lagður í
veitingar og er meðal annars boðið uppá grænmeti úr gróðurhúsum staðarins og heimabakað brauð. Daglegt
grillhlaðborð er í boði yfir sumarið. Kvöldverður í boði allt árið um kring og hádegisverðarhlaðborð fyrir hópa. Gestir geta upplifað fallegt umhverfið í stóra og bjarta veitingasalnum á meðan þeir njóta matarins, en salurinn tekur allt að 80 manns í sæti.
Gauksmýrartjörn sem er í um 10 min göngufjarlægð frá Gauksmýri er mikil
fuglaparadís. Um 35 tegundir fugla hafa sést þar, m.a. Flórgoði. Gönguleiðin er fær hjólastólum.
Auk mýrar- og fjallendisins sem Línakradalur státar af er Gauksmýri vel staðsett til
skoðunarferða á norðvesturlandi. Meðal áhugaverðra staða í nágrenninu eru Borgarvirki, Selasetur Íslands á Hvammstanga, Hvítserkur, Breiðabólsstaður og Kolugljúfur.
Gestgjafar Gauksmýrar leggja áherslu á umhverfisvernd í verki og góða þjónustu.
> Gauksmýri var bær mánaðarins í september 2012.
Bær mánaðarins er sérstök viðurkenning sem veitt er einum fyrirmyndar ferðaþjónustubæ innan vébanda Ferðaþjónustu bænda í hverjum mánuði. Valið er byggt á umsögnum gesta og mati starfsfólks skrifstofu Ferðaþjónustu bænda þar sem horft er til frammistöðu bæjarins á sviði gæða - og umhverfismála, vöruþróunar og í þjónustu við viðskiptavini.
Gauksmýri er við þjóðveg 1 mitt á milli Reykjavíkur og Akureyrar, 194 km til hvors staðar.