Fossatún er staðsett á bökkum Grímsár í Borgarfirði á heimili trölla.  Þar er að finna veitingastað, tjaldsvæði, gistingu í uppbúnum rúmum, Tröllagarð og leiktæki fyrir börn og fullorðna.  Góðar gönguleiðir í nágrenninu.

Veitingahúsið stendur við Tröllafossa, og þar má sjá hina brosandi tröllkonu Drífu, sem er aðalsögupersóna sögunnar Tryggðatröll.  Á boðstólum er fjölbreyttur matseðill gómsætra rétta fyrir einstaklinga og hópa. Góð funda- og ráðstefnuaðstaða. Einnig geta matargestir horft á sýninguna Hljómfagra Ísland, en í henni er íslensk tónlist og íslenskar náttúrumyndir settar saman af einstakri natni og smekkvísi og það verður skiljanlegt hvers vegna tónlist og náttúra eiga sér bústað hlið við hlið í íslenskri þjóðarsál.

Í andyri veitingahússins er að finna móttöku fyrir allt svæðið auk afgreiðslu fyrir kaffihúsaveitingar, kökur, kaldar samlokur, ís, pulsur, gos ofl. Þar er nettengd tölva og þráðlaust netsamband, miðlun upplýsinga, útlán leiktækja og ýmis önnur þjónusta við gesti Fossatúns.

5 stjörnu tjaldsvæði samkvæmt flokkun Ferðamálastofu. Á tjaldsvæðinu er gott rými fyrir tjöld, fellihýsi, húsvagna og húsbíla. Mjög góð hreinlætisaðstaða, heitir pottar. Frábær afþreyingar- og leikaðstaða fyrir börn, unglinga og fullorðna.

Gisting í uppbúnum rúmum: 120 m2 hús með þremur tveggja manna herbergjum og einu fjölskylduherbergi.  22" sjónvarp með DVD spilara er í öllum herbergjum og 32" sjónvarp og DVD spilari er í stofu. Eldhús og stofa. Sturta er á salerni, ásamt þvottavél og þurrkara. Pallar eru við suður- og vesturhlið hússins. Gestir hafa aðgengi að heitum pottum í þjónustuhúsi tjaldsvæðis sem er um 150 m frá húsinu.

Tröllagarðurinn:  Staðahaldarinn, Steinar Berg, hefur sérhæft sig í skrifum tröllasagna, sem myndskreyttar eru af Brian Pilkington. Tröllagangan er gönguleið sem liðast upp Stekkjarás, meðfram bökkum Grímsár og tilbaka að veitingahúsinu. Hægt er að fara stuttan hring, 10-15 mín með stoppum eða stærri hring 30-60 mín.  Gestum gefst kostur á að skoða sögusvið tröllasagna, myndir og styttur af tröllum, fræðast nánar um þátt þeirra í þjóðsögunum kynnast örnefnum og koma áhyggjulausir tilbaka! Rúsínan í pylsuendanum er svo að fara í tröllaleiki og keppa í tröllaþrautum s.s. tröllataki, tröllatogi, tröllasparki, tröllaorðum,  tröllafeti, tröllaparís o.fl. Þegar komið er tilbaka, sést steingert andlit Drífu frá pallinum á veitingahúsinu.

Fossatún er við veg nr. 50.